WOW është program përmes të cilit vajzat e trajnuara përfitojnë shkathtësi të duhura për të gjetur punë si të vetëpunësuara në tregun e punës online. Projekti WOW 3 synon të rrisë vetëdijësimin e vajzave të reja në rolin e punës online, mundësitë e punësimit, dhe mundësinë për t’u anagazhuar në punë nga distanca.

Lumta Ramadani është njëra nga pjesëmarrëset më të sukseshme në projektin WOW 3. Ajo tashmë ka treguar shumë sukses me punën dhe përkushtimin e saj, duke fituar 6 kontrata pune, ndër të cilat është edhe një kontratë njëvjeçare.

Lumta ka përfunduar studimet bachelor në Banka, Financa dhe Kontabilitet në Universitetin e Prishtinës dhe master në Ekonomiks poashtu në Universitetin e Prishtinës. Gjithashtu, ka qenë dy herë përfituese e bursës Erasmus Mundus.

Për nga natyra është njeri që ka dëshirë të mësojë gjëra të reja. Përmes Dizajnit Grafik  ajo synon ta shpërfaqë kreativitetin dhe shijen e sofistikuar për dizajne, që burojnë nga udhëtimet e saj të shumta jashtë vendit, që e kanë frymëzuar.

Lumta thotë:

Rrugëtimi im ka qenë i vështirë, mirëpo nuk jam dorëzuar. Jam person që nuk dorëzohem asnjëherë. Qëllimi im ka qenë të gjej punë, e kam marrë me shumë seriozitet këtë qëllim dhe ja kam dalur mbanë. Mendoj që duhet të jesh largpamëse dhe të besosh në veten tënde e të besosh që ti mund të arrish çkado, e pastaj natyrisht që i arrin të gjitha synimet e tua.

Projekti WOW 3 po i afrohet përmbylljes. Në këtë projekt ishin pjesëmarrëse 50 vajza nga komuna e Prishtinës, dhe 80 vajza nga komun e Gjilanit. Pra pritet që tregut të punës online t’i shtohen rreth 130 freelancer-e të reja në fushën e Dizajnit Grafik dhe në Front-End. Edhe gjatë fazave të para të trajnimit, pjesëmarrëset janë treguar shumë të sukseshme duke aplikuar në punë online dhe duke përfituar kontrata ndërkombëtare. Ky trend i suksesit po vazhdon edhe tani gjatë fazës finale të projektit, ku vajzat po vazhdojnë të fitojnë kontrata online. Ndër vajzat që kanë fituar kontratën e parë të punës online dhe që po vazhdon t’i aplikojë njohuritë e fituara gjatë trajnimit edhe përmes punës ofline është edhe Vesa Broja, e cila na tregon më shumë për përvojën e saj.

Unë e kam të përfunduar nivelin bachelor në fakultetin e inxhinierisë elektrike dhe kompjuterike, dega telekomunakacion. Momentalisht jam absolvente master në të njejtin drejtim. Merrem me biznes privat që e kemi mjaft të zgjeruar, i cili quhet Broja Market dhe jam menaxhere në firmë. Kjo edhe ka qenë shtyrje për mua që ta marr Front End drejtimin, për të pasë mundesinë të krijojë vet një web faqe për firmën tonë, në të cilën jam duke punuar me djalin e axhës i cili është dizajner.

Ky është rrugëtimi im që tregon se si jam bërë pjesë e WOW. E pashë në facebook se është hapur konkursi për pranim në regjionin e Prishtinës, dhe pa hezituar aplikova unë dhe dy shoqe te miat. Ditën që ishte testi erdha në momentin e fundit pasi që isha në Mitrovicë edhe punët që i pata për ti kryer nuk më premtonin kohë të mjaftueshme për të arritur të testohem, por për fat ja arrita. Në rezultate doli se jam pranuar dhe isha mjaft e lumtur për shkak se numri i aplikantëve ishte mjaft i madh, si dhe mendoj që koha ishte ideale pasi punë me orar të plotë nuk kisha dhe koha ishte ideale për mua për të mësuar diqka të re. Për aq sa munda u perkushtova dhe mendoj se me përkushtim maksimal edhe përfitimi nga projekti mundet me qenë maksimal dhe vajzat mund të fitojnë shumë në dije, në punë etj. Punët që mund të kryhen me mësimet në WOW, punët që i gjejmë munden me qenë parësore (full time), munden edhe dytësore(part time), si shtesë apo edhe kur ne kemi pak kohë, punë ka gjithmonë. Përmes WOW, un kam gjetur një profesion të cilin mund ta ushtroj sipas orarit që më përshatet, dhe për aq sa punoj edhe fitoj të hyra, kshtu që shpresoj që kam me ju kthy punës në Upwork me shumë angazhime edhe me përfitime.

Projekti WOW (Women in Online Work) është implementuar nën mbikqyrjen e Ministrisë për Zhvillim Ekonomik dhe është financuar përmes Community Development Fund (CDF) & EMPOWER “Private Sector in Kosovo”, USAID. Projekti WOW 3 është implementuar sukseshëm nga Cacttus në bashkëpunim me OJQ KS-Kosova. Përderisa projekti po i afrohet përfundimit suksesi i vajzave pjesëmarrëse vetëm sa ka filluar.

Ndër vajzat që kanë filluar sukseshëm karrierën si ‘freelancer’ është edhe Syzana. Kjo është storja e saj.

Jam Syzana Alidemi, jetoj në Gjilan. Tani jam në përfundim të studimeve postdiplomike në Fakultetin Ekonomik drejtimi Menaxhment dhe Informatikë në Universitetin e Prishtinës. Krahas shkollimit kam vijuar paralelisht edhe aktivitete të tjera arsimore, si trajnime në planifikimin e karrierës, lidership, biznes, ndërrmarësi për gratë dhe së fundi trajnimin në Graphic Design.

Jam tip hulumtues, dhe vazhdimisht kërkoj mundësi të reja në tregun e punës. Duke u ballafaquar me sfidat e punësimit në vendin tonë nuk prita rastin deri sa të gjeja “punën ideale”. Falë përkushtimit dhe ideve të mia kam themeluar, dhe menaxhoj biznesin tim, atelien “Zana Couture”  duke sjelle në treg shërbime të qepjes dhe dizajnimit të fustaneve & veshjeve për femra.

Rreth projektit WOW, isha e informuar edhe më parë nga rrjetet sociale dhe u interesova t’i bashkangjitem, mirëpo në atë kohë projekti ishte impelementuar në qytetet tjera. Fatmirsisht këtë vit WOW3 kishte hapur aplikacionet edhe në qytetin e Gjilanit me programin Front-end development dhe Graphic Design. Aplikova në Graphic Design meqenëse biznesi me te cilin merrem kërkon aftësi kreative në dizajn për promovimin e veshjeve. Ishte momenti më i pershtatshëm të ndjek programin e dizajnit grafik në WOW3. Edhe pse kam mbaruar studimet në ekonomi, pasioni për dizajnin ka qenë pjesë e kreativitetit me anë të së cilës gjithmon kam shpreh talentin tim. Andaj kursi i dizajnit grafik ishte i mirëseardhur për mua .

Gjatë trajnimeve, Donika trajnerja jonë pas hapjes së profileve në upwork, na inkurajonte vazhdimisht të aplikonim në fushat ku ne mund ta gjenim veten. Fillova të hulumtoj punë te ndryshme, mirëpo hezitoja të aplikoja, sepse nuk kisha besim që mund t’ia dal. Pas përfundimit të trajnimit, fillova me aplikimin e njohurive të fituara në dizajn, për promovimin e biznesit tim. E ridizajnova logon e biznesit, i rregulloja fotografitë e fustaneve në mënyrë më profesionale, si dhe punë tjera grafike të cilat dukshëm filluan t’ia rrisin imazhin ateles. Me përvetsimin e programeve në dizajn, aplikoja vazhdimisht punë te ndryshme online. Në fillim u zhgënjeva për faktin që nuk arrija të bëja asnjë kontratë, përkundër numrit të madh të aplikimeve të bëra. Ndonjehere nuk ndjehesha e motivuar të vazhdoja tutje me aplikime. Mirëpo gjatë takimeve dy javore me mentorët tanë, vazhdimisht inkuarajoheshim të mos heqim dorë, të provojme tutje. Ata na inkurajonin me storie suksesi të vajzave të cilat aplikonin vazhdimisht punë të ndryshme dhe fitonin kontrata me sukses, andaj nuk hoqa dorë.

Kisha aplikuar në një pozitë ku kërkoheshin njerëz që jetojnë në Kosovë për një punë të lehtë në industrinë e fustaneve. Të nesërmen në mëngjes, mora mesazhin falenderues për aplikimin në këtë pozite, dhe shpjegimin rreth kohës së përshtatshme për të diskutuar rreth detajeve të punës. Pasi  kjo kliente punonte në Hong Kong, diferenca në kohë duhej të kordinohej me orarin e punës në Kinë.

Pas instruksioneve rreth punës, i tregova që isha e gatshme ta bëja dhe më dergoi kontratën. E pranova punën dhe e perfundova me sukses. Klientja u nda e knaqur me punën time duke me vlersuar edhe me feedback pozitiv. Ishte ndjenjë e veçantë kur fitova kontratën e parë, sepse mu rrit vetbesimi se duke provuar mund t’ia dal të marr edhe punë të tjera në upwork. Isha e lumtur, dhe njëkohësisht e motivuar të vazhdoj tutje. Tani kam pranuar edhe disa ftesa për intervistë, dhe jam në negocime për disa kontrata të mundshme për punë. Ndihem e lumtur që pata fatin të jem pjesë e WOW3. Jam falenderuese ndaj trajnerëve, dhe mentorëve tanë, të cilët me profesionalizmin e tyre po na motivojnë vazhdimisht të aplikojmë, të pavarsohemi financiarisht, dhe të arrijme synimet tona drejt suksesit. Por gjithashtu jam falenderuese edhe ndaj familjes sime e cila me ka mbështetur në edukimin e mirëfilltë dhe në arritjet profesionale për të arritur vizionin e dëshiruar.