Cacttus Education dhe Shkolla “Lutfi Musiqi” në Vushtrri nënshkruajnë Memorandum Bashkëpunimi për edukim praktik dhe trajnime te vazhdueshme.

Cacttus Education dhe Shkolla e Mesme “Lutfi Musiqi” në Vushtrri kanë zyrtarizuar bashkëpunimin e tyre përmes nënshkrimit të një Memorandumi Bashkëpunimi (MoU), duke shënuar një hap të rëndësishëm drejt avancimit të arsimit praktik dhe përgatitjes së nxënësve për tregun bashkëkohor të punës.

Ky partneritet synon krijimin e mundësive konkrete për nxënësit, veçanërisht në fushën e Teknologjisë së Informacionit dhe Komunikimit (TIK), përmes mësimit dual, trajnimeve praktike dhe qasjes së bazuar në projekte reale. Bashkëpunimi fokusohet në lidhjen e drejtpërdrejtë të dijes teorike me praktikën profesionale, duke i afruar nxënësit me realitetin e industrisë dhe kërkesat aktuale të punëdhënësve.

Çfarë përfiton nxënësi?

Në kuadër të këtij memorandumi, nxënësit e shkollës “Lutfi Musiqi” do të kenë mundësi të përfshihen në:

• Trajnime profesionale të orientuara sipas nevojave reale të tregut të punës
• Mentorim nga profesionistë dhe ekspertë të industrisë së teknologjisë
• Vizita studimore dhe njohje praktike me ambientet reale të punës
• Projekte praktike që zhvillojnë kreativitetin, mendimin kritik dhe punën në ekip
• Shkëmbim përvojash mes arsimit të mesëm dhe atij profesional

Këto aktivitete synojnë të krijojnë një urë të fortë bashkëpunimi mes shkollës dhe industrisë, duke ndihmuar nxënësit të zhvillojnë kompetenca teknike dhe aftësi të buta që janë thelbësore për suksesin e tyre profesional.

Cacttus Education dhe Shkolla “Lutfi Musiqi” besojnë se investimi në dije, inovacion dhe bashkëpunime afatgjata është kyç për ndërtimin e një të ardhmeje të qëndrueshme për brezat e rinj.

Palët do të vazhdojnë të punojnë ngushtë për zbatimin e aktiviteteve konkrete që e bëjnë arsimin më praktik, më të lidhur me tregun e punës dhe më të orientuar drejt zhvillimit dhe suksesit të nxënësve.